HOT TOPICS

原諒出軌的老公?


另一半偷食,由古至今都屢見不鮮,已經唔係啲咩新鮮事。遇到誘惑時「貪心」係人嘅天性,偷食無分男女。當發現另一半偷食時,應該放低呢個人?定係應該放低呢件事呢?

圖片來源:Instagram、YouTube 訪問片段


每隔一段日子,又會爆出某藝人或藝人嘅老公偷食,不過最後都有唔少老婆選擇原諒佢哋老公。回顧一下近年偷食斷正,而又獲得老婆原諒嘅例子:



近月熱話當然係前商台DJ 細So 偷食已為人母嘅KOL Macy 事件。9月初,被爆出原來兩人偷食已維持兩年半,女方接受訪問時更暗示曾接受人工流產手術及有性病椰菜花。



而細So 於報導出街後,公開向太太道歉及認錯,承諾往後會做好丈夫及好爸爸。


細So 老婆阿Wing 亦公開表示會和細So 繼續走下去。




近年最轟動嘅偷食事件,當然係2019 年許志安同黃心穎嘅「安心偷食事件」。許志安同黃心穎喺的士車廂中嘅對話同行為親密,全程被車cam 影晒並被公開,許更在黃居住嘅鯉魚門一同落車。



事後許志安舉行記者會鞠躬致歉,表示自己做咗一件不被原諒嘅事,亦要向妻子、自己嘅家人、妻子嘅家人、雙方朋友及愛護佢嘅人致萬分歉意,形容自己係「壞咗嘅人」,懇請外界給予時間尋回自我。而黃心穎就喺社交平台貼文致歉,並因此事淡出演藝圈。


老婆鄭秀文其後喺社交平台引用《聖經》中《哥林多前書》13章7節的內容:「凡事包容,凡事相信,凡事盼望,凡事忍耐。」回應事件。




數月前,已為兩子之母嘅名模周汶錡 Kathy,其法籍老公喺距離淺水灣寓所僅5 分鐘車程嘅深水灣,與外籍女於茶座纏綿,最後同車離開,而且已經唔係第一次被影到偷食,與Kathy 拍拖時已經斷正過。



事隔一個多星期,Kathy 喺IG 回應:「感謝我的家人和朋友,這些年來大家一直很關心我,愛護我。不好意思,最近讓你們擔心了!這是一個人生重要的功課!我們會努力把功課做好,從中學習,領悟,進步!我倆仍然相信『愛』能改善彼此關係,也是化解問題的源頭力量!日後我們仍然會努力,為孩子、為家庭、為對方,互相珍惜,一起進步!實在感恩,我們生命中已擁有許多!疫情在前,希望大家都好好持護身心健康! 愛你們!Happy 3rd birthday to our wonderful son . Love you Avner Lepeu.」




2016 年伍詠薇老公練海棠再度被拍到密會女子,伍姑娘大方回應:「抵佢死啦!要打籮柚!」、「希望佢今次之後乖乖哋」,又話一定要打老公200 大板,但同時自己都要檢討,檢討一下會唔會係自己忙於工作,而忽略了身邊人。更代為向公眾道歉。


2018 年結婚19 週年時,伍詠薇再重提表示:「之後有同老公坦白咁傾:『可唔可以繼續走落去?發生咩事?』就算佢呃我,都要講,其實我自己都有責任,嗰個階段我好鍾意拍攝工作,變咗比較少時間陪佢。而最近嗰次出軌嘅報導,我就同佢講:『走唔甩啦!唔係我睇到,係記者發現!』係好心痛、好失望。但丈夫係自己揀嘅,與其諗係唔係一面倒佢錯,倒不如檢討吓自己有冇錯。我呢個人係傻,但我都好均真、好包容,所以我覺得發生呢種事,當中我都有問題。唔係話相唔相信佢,我信呢件事屬真,但件事發生咗,我係要去包容佢、再同佢相處,坦誠溝通後,再睇吓我哋可唔可以再一起走落去。」





近月,田蕊妮接受陳志雲訪問,提起與杜汶澤拍拖時亦曾發現對方偷食,而且知道邊個係第三者。



阿田表示雖然自己係個比較理性嘅人,但面對另一半不忠,所有女人懷疑另一半出軌時會做嘅事,佢都有做過。例如Check 電話、盤問對方,但過程當中自己一啲都唔好受。最後當自己搵到足夠證據,就搵杜汶澤對質。「因為我哋係由好朋友開始,所以我喺談判過程冇歇斯底里,亦好冷靜去傾。互相可以有啲咩選擇,大家是否願意行下去,之後佢會點做;如果大家願意努力改善,願意一齊走下去,就繼續喺埋一齊。以前嘅事就當粉筆字抹走佢,唔好時不時拎返出來講。」阿田表示,如果自己拔唔走呢條剌,就唔好繼續一齊,因為自己會好痛苦,大家只會活喺輪迴當中互相折磨。一段時間後,佢成功放低咗件事。佢覺得愛一個人無法去計算同衡量,係一個緣份。


其實出軌嘅老公值唔值得原諒,只有同佢哋一齊生活過、一齊經歷過無數高低起跌嘅老婆先可以衡量到,外人係無法理解。只有一齊經歷過,並了解對方,先知仲值唔值得繼續一齊。
每個人都並不完美,包括我哋自己。正因為人嘅性格並唔完美,每段關係都總會有啲缺憾,人生都總會有啲遺憾。如果能夠好似以上例子嘅老婆們一樣,有神級嘅心理質素,能視之為彼此嘅一個小難關,一齊跨過去,都係一個唔錯嘅處理方法。
無論能唔能夠拔走心中條刺,我哋都應該學會「放下」同「原諒」,即使唔能夠繼續走下去,放過別人、放過自己都係件好事。


想追蹤更多資訊,請 Like & Follow 我地FB專頁啦