RELATIONSHIP

好好享受回復單身的日子


相信大部份人都會經歷失戀,每一次失戀,其實都累積咗一個經驗,從而更了解自己需要啲乜。年月漸長再望返轉頭,失戀只不過係一個成長經歷。

圖片來源:Pexels.com


上興趣班、學習新事物、進修自我增值





回復單身後,多咗好多私人時間,最好梗係去學習下自己有興趣嘅新事物啦,可以係一個興趣班、一個短期課程、或者繼續進修下自己本身嘅知識同技能。一來可以趁多咗時間,增值下自己;二來將自己嘅schedule 填滿,等自己少啲空檔時間諗起傷心事,一舉兩得。



享受獨處時光





現代女性多數都好獨立,唔一定做每件事都需要有人陪,唔一定獨處就覺得不安。偶爾甩咗拖嘅空窗期,係學習下自己獨處嘅好機會。一個人都有好多嘢可以做,例如睇下Youtube、煲下Netflix、煮下嘢食、整下甜品、去cafe 飲住咖啡睇下書、一個人行下街買買買 & 飲飲食食。享受下一個人嘅寧靜,可能會從中找到樂趣。



多咗時間約朋友





學會獨處之餘,當然唔可以從此就變成拒絕社交嘅宅女啦。拍拖時難以避免見少咗friends,或者難啲夾時間約到,趁住空窗期安排時間可以flexible 啲,多啲搵閨密去飯聚、影相打卡、high tea都好呀。



一個人去旅行





如果你未試過一個人去旅行,甩咗拖期間試下一個人去個short trip,簡直係挑戰自我嘅好時機。試下由book 機票 & 酒店、plan 行程全部自己決定,一手包辦,兼且學下睇地圖。當然同屋企人/男朋友/朋友一齊去旅行梗係開心啦,一個人旅行玩法唔同,所見所聞、所體會同感受到嘅嘢都會唔同,如果有興趣都可以試下travel alone ga。
不過要注意,初次體驗獨自旅行,最好㨂啲治安較好嘅城市,去個幾日嘅短途trip 試下適唔適合自己先。荒山野嶺、黑暗僻靜嘅陌生地方都唔建議一個人去喇。



多做運動保持身心健康





失戀期間心情難免會低落啲,做帶氧運動可以減壓好多人都知,話唔定出一身汗心情會好轉ga。如果平時都有做開運動,可以再加強訓練,問下教練點train 可以再fit 啲,練成一個身心健康嘅better me,準備遇到下一個更合適嘅「他」。



呢個世界冇話邊個冇咗邊個唔得,即使失戀會好痛苦,但日子一樣要過,太陽明天照樣如常升起,唯有「時間」幫到自己療傷。
記住一定要對自己好啲,好好享受回復單身嘅日子,調節自己嘅心理同外形至最佳狀態,準備好去遇上更適合自己嘅另一半。

想追蹤更多資訊,請 Like & Follow 我地FB專頁啦